قابلته استغربت سألته ليه؟
ضحك وقال لي : يا بنتي أوامر البيه
منقدرشي منسمعشي ولا ننفذشي أو نعترض عليه
قلت له : بس انت عارف انه غلط .. ولا ايه؟
قال : يا بنتي موال مقدرشي أنا عليه
أنا عندي عيال عايز اربيهم وأعيش في أمان الله
أنا مش حمل بهدلة وسين جيم وازاي وليه
خليني عايش ف حالي واللي يقسمهولي انا راضي بيه
قلت له : بس حقنا لازم نطالب بيه
قال : حق مين بس اللي بتقولي عليه!
خليكي جنب الحيط وعمرك خافي عليه
مينفعشي كتر كلام ف الزمن اللي عايشين فيه
دي غابة القوي فيها حاكم والضعيف محكوم عليه
قلت له : بس الشعب الغلبان ده ذنبه إيه؟
ليه نرضى بالظلم وربنا مرضيش بيه؟
قال لي : هما كلمتين خديهم مني حكمة
كتر الكلام ف البلد دي للراس لخمة
احنا نسمع ونطيع من غير أي كلمة
واللي ناخده هيعَيّشنا ودي من ربنا نعمة
قلت له : حتى لو بالرشوة والتزوير؟
حتى لو اعتدينا على حقوق الغير؟
حتى لو قفلنا كل طرق الخير؟
قال : كل واحد هيقف قدام ربه
وهيتحاسب وهيتعاقب عن ذنبه
واللي زينا له الجنة على صبره وغلبه
قلت له : ازاي وانت عارف وساكت؟!
ازاي وقدام عينيك الكفة مالت؟!
ازاي وانت شايف المعصية هانت؟!
مسح عمنا دمعة من عينيه سالت
وقال : يا بنتي انا مفيش في ايدي أي قرار
أنا بنفذ لكن جوايا ميت إنكار
عِلِي صوتي .. قلت : ليه؟
تنفذ الأمر وانت مش راضي بيه؟
مش عارف ان ربنا هيحاسبك عليه؟
قال : ما هي الحكاية يا بنت الأصول
اني هنا " عبد المأمور " !
أنا هنا " عبد المأمور " !!!!
